ايه بقى حالة الهبل دي؟

بقى دول ظباط جيش يا اخواتي؟ امال المزز الكتاكيت اللي
بنشوفهم في الشارع دول ايه؟ استبدلوا الجيش الحقيقي وجابوا لنا نجوم من هوليوود
وقفوهم في الشارع وخبوا الاصليين؟
اصل لو دول ظباط الجيش الاصليين يبقى عملوا فينا جميلة انهم
خفوهم

طب اوجد سبع اختلافات بين الفيديو الاول
والثاني

اظرف الولاء؟ اظرف ايه يا سنكوح انت؟ هو فيه قيادة في الجيش
حياخد ظرف؟ ويكرمشوا له ميت جنيه ويحطوها في ايده؟
لا وطبعا بيقول للشعب المصري ان
جيشكم الحقيقي هو اللي انت شيلته العيل وعمل بيبي على رجله وهو اللي اتصورت على
دبابته.. انما المجلس العسكري لا.. المجلس العسكري ده من الجيل اللي حارب في تلاتة
وسبعين، الجيل اللي هو "اوسخ من انجمت القوات المسلحة" خصوصا المجموعة دي اللي
كانوا شباب مش قادة في الحرب، يعني كان المفروض يموتوا في حرب 73 لإنهم حاربوا
بنفسهم ما كانوش قاعدين في اودة يتابعوا.. بس ربنا كاتب لهم عمر، وعلى وشه حسني
مبارك وعلى ودنه حسني مبارك وعلى صدرها تنور على كتفها تنور




عرفت تلاقي سبع اختلافات بين
الفيديو الاول والتاني؟


طيب.. اوجد تلات اختلافات بين الفيديو الاول
والتاني








ههههههههه ايه الواد ده؟ جبتي البسيمه؟ وقالك: ظابط جيش
يفضح طنطاوي.. ايه الفضايح اللي قالها؟ "احنا رجالة وحنقف وقفة رجالة" لا فضيحة
كبيرة فعلا، وفيه معلومة خطيرة وسرية: يا دكتور شرف.. انت اتشالت في ميدان
التحرير.. ده سر حربي، ربنا ينجيه بقى ممكن يروح في داهية بسبب المعلومة دي، هو قال
ايه بقى؟


حلوين قوي السنكري ومراقب دودة القطن دول.. دول اتاخدوا
لائق ازاي؟ ده كل ظباط الجيش واقفين لنا في الشارع عاملين زي الباب ابو ضرفتين.. من
امتى الجيش بياخد سبارس؟


اي شخص مصدق ان فيه حاجة اسمها ظابط جيش ينزل مظاهرة في
ميدان التحرير يبقى يحط البافيتة عشان الالتهاب الرئوي من الريالة حيبهدله


وبالمناسبة انا لما سمعت القلق اللي حصل على احمد شومان
كلمت دعاء سلطان وهي صاحبة مراته وكلمتها وبعد شوية هو بنفسه كلمني عشان يطمني
عليه، وكان متضايق قوي من الاشاعات دي وبيقول لي انا باكلمك عشان اعرف منك مين اللي
بيعمل كده؟ انا من اسبوع الناس بقت تكلمني تقول لي: انت اتقتلت؟
قلت له
الكلام ده بينزله عمر عفيفي
قال لي: مين عمر عفيفي؟
قلت له له صفحة على الفيس
بوك
قال
لي: احنا مش بنخش على الفيس بوك، احنا ظباط جيش، والكلام اللي بيحصل ده ممكن يضرنا
كلنا


وطبعا زي ماهو واضح الفيديوهات دي مش متسجلة في مصر
اساسا
المهم يعني اني حاسة ان الشبورة دي معمولة عشان ما نركزش
على مطالبنا ونفضل نلف حوالين نفسنا ونعيش في افلام الساسبنس دي ونشتغل روحنا


احنا مطالبنا:
1- محاكمة مبارك واسرته واسترداد
اموالنا منه
2- محاكمة الثلاثي المرح
3- حل الحزب الوطني وتجميد نشاط
اعضائه
4-
اشراف قضائي وحقوقي على جهاز الامن الوطني


بس مين اللي بيعمل كده؟ اقصد غير
عمر عفيفي.. مين اللي بيعمل كده وليه؟
عموما انا مبسوطة ان الاخوان
نازلين، عشان اي حد يخرف نداء خاص مني الى الاخوان: اي حد يهبل ادوا له واحدة سلمية
سلمية لما تفعصوه